विवाहको दिनदेखि आँचल र उदिपले सामाजिक सञ्जालमा एकअर्काको तस्विर पोस्ट नगरेको सम्भवतः कुनै दिन छैन । कामको शिलशिलामा एक दिन मात्र छुटिएर बस्नु परे उनीहरु सामाजिक सञ्जालमै प्रेम पोख्न थाल्छन् । उनीहरुले विवाह गरेको आउँदो फागुनमा दुई वर्ष हुन्छ । तर, यो जोडीको प्रेम अफेयरमा रहँदाको भन्दा कम छैन । उनीहरुको माया देखेर जिल्नेहरु धेरै छन् ।

यतिबेला विवाहको सिजन छ । आँचल र उदिपलाई पनि आफन्तको विवाह र रिसेप्सन पार्टीमा जान राम्रै दौडधुप छ । यसैक्रममा, शनिवार उदिपले इन्स्टा स्टोरीमा एक भिडियो राखेका छन्, जसमा उनको हातमा आँचलको नामको मेहन्दी देख्न सकिन्छ । उक्त भिडियो आँचलले पनि इन्टामा शेयर गर्दै लेखेकी छन्, ‘यू आर सो सो क्यूट ।’ भिडियोमा दुवैले एकअर्काको हात समातेका छन् ।

विशेषगरी युवतीहरुले बिहेको अघिल्लो दिन हुनेवाला श्रीमानको नाम लेख्दै हातमा मेहन्दी लगाउने गरेका छन् । हातमा लगाएको मेहन्दीको रंग गाढा भयो भने माया पनि गाढा हुन्छ भन्ने मान्यता छ । उदिपले भने आफ्नो हातमा मेहन्दीले श्रीमतीको नाम लेखेका छन् । उनको हातमा मेहन्दीको रंग पनि गाढै देखिन्छ । यो देख्दा जो कोहीलाई भन्न करै लाग्छ, ‘वाह् ! माया होस् त यस्तो पो ।’