काठमाडौँ । नेपाल आर्थिक पत्रकार संघ (नाफिज)मा नयाँ कार्यसमिति चयन भएको छ।
बिहीबार सम्पन्न १३औँ वार्षिकोत्सव तथा छैठौँ महासभाबाट नाफिजमा मोदनाथ ढकालको नेतृत्वमा १३ सदस्यीय नयाँ कार्यसमिति भएको हो। यसमध्ये २ जना मनोनीत सदस्य बन्नेछन् ।
महासभामा निर्वाचन प्रक्रियाद्वारा नयाँ नेतृत्वसहितको कार्यसमिति चयन गरिएको हो। यसअनुसार नाफिजको अध्यक्षमा राइजिङ नेपालका मोदनाथ ढकाल निर्वाचित भए।
ढकालले १०५ मत ल्याएर नाफिजको अध्यक्षमा दोस्रो पटक निर्वाचित बनेका हुन् । उनका प्रतिस्पर्धी भुवन आचार्यले २३ भोट ल्याएका थिए । आचार्य रेडियो नेपालमा आबद्ध छन् ।
यस्तै, उपाध्यक्षमा नोटबजारका परमेश्वर अधिकारी र हाम्रो अर्थकी मेनुका कार्की निर्वाचित भए। उनीहरूले क्रमशः ८२ र ९२ मत ल्याएका छन् । यस्तै, उपाध्यक्षका प्रतिस्पर्धी इन्द्र बानियाँले ४९ मत ल्याएका थिए ।
यसैगरी, महासचिवमा अनलाइनखबरका नविन ढुंगाना, सचिवमा नेपालखबरका दीपक भट्ट र कोषाध्यक्षमा सिंहदरबारकी दिलु कार्की निर्विरोध निर्वाचित भए। यस्तै, सदस्यहरूमा रातोपाटीका निकेश खत्री (७५ मत), अनलाइनखबरका विजय पराजुली (७१ मत), सेतोपाटीकी सबिना कार्की (६७ मत) र नेपालप्रेसका राजाराम न्यौपाने (४८ मत) विजयी भए।
यसबाहेक, कारोबार दैनिकका परिवर्तन देवकोटा (भोला)ले ४२ मत ल्याए । नयाँ पत्रिकाका मिलन विश्वकर्माले ४१ मत ल्याउँदा, शिलापत्रका सुधिर भण्डारीले ३८, बिजपाटीका निरोजकुमार थापाले २०, कर्पोरेट नेपालका नविन पोखरेलले २० मत ल्याए । यसैगरी, न्यूज एजेन्सी नेपालका अनिश मिजारले १९ मत ल्याएका थिए।
नेपालीरैबार । २०७९ मंसिर २९, बिहीबार