सुर्खेत । कर्णाली राष्ट्रिय मुक्ति मोर्चा पुनर्गठित गरिएको छ । तत्कालीन माओवादी सशस्त्र युद्धका समयमा ९०५७० गठित भेरी–कर्णाली राष्ट्रिय मुक्ति मोर्चा शान्ति प्रक्रियासँगै निष्क्रिय बनेको थियो । अहिले गणेश भण्डारीको संयोजकत्वमा २३ सदस्यीय मोर्चा पुनर्गठित गरिएको हो ।

माओवादी केन्द्रले जनतामा फर्किने संकल्प गरेपछि पुसमा बसेको केन्द्रीय बैठकले जातीय र क्षेत्रीय मोर्चा ब्युँताउने निर्णय गरेको थियो । सोही अनुसार कर्णाली राष्ट्रिय मुक्ति मोर्चालाई पनि पुनर्गठित गरिएको संयोजक गणेश भण्डारीले बताए । मोर्चाको प्रदेश इन्चार्ज भने माओवादी नेता नरेश भण्डारी छन् ।  “कर्णालीका उत्पीडित, उपेक्षित, भक्तिकामी जनता एक होऔूँ” भन्ने मूल नारा तयार गरेको पुनर्गठित मोर्चाले चरणबद्ध कार्यक्रमहरूको घोषणा गरेको छ । जस अन्तर्गत आगामी जेठ १ गते प्रदेशका १० वटै जिल्लामा एक साथ भेला सम्पन्न गर्ने, ५ गते राजधानी सुर्खेतमा विशाल अन्तरक्रिया कार्यक्रम गर्ने र आगामी जेठ २० गते सम्पूर्ण पालिकाहरूमा भेलाहरू सम्पन्न गरिने संयोजक गणेश भण्डारीले बताएका छन् ।

विकृति, विसङ्गति, भ्रष्टाचारका विरुद्ध तथा जनजीविका, विकास निर्माण लगायतका जनसरोकारका विषयमा संघर्षका कार्यक्रमहरू पनि गरिने छ, उनले भने, आगामी भाद्र १५ गतेबाट कर्णाली मुक्ति मोर्चा प्रारम्भ गरिने छ । यस्तै मोर्चाको केन्द्रीय कार्यालय वीरेन्द्रनगरमा र विशेष कार्यालय जुम्लाको सिञ्जामा राखिने छ । मोर्चाका प्रदेश इन्चार्ज नरेश भण्डारीले कर्णाली युगको सूर्योदय कर्णालीबाट नै सुरु गर्नुपर्ने बताए । गहिरा तालजस्तै कर्णालीका पीडाहरू पनि छन्, त्यसलाई मुक्त गर्न हामीले संघर्ष गर्ने छौँ, उनले भने ।