काठमाडौं । सरकारले दुबईको विमानस्थलमा पुगेर पनि रित्तै फर्किएको नेपाल वायुसेवा निगमको जहाजलाई स्वदेश फर्कन नपाएका नेपाली श्रमिकलाई ल्याउन अनुमति दिएको छ। सिसिएमसीको आदेश पाएपछि निगमको जहाज युएई पुगेपछि रित्तै स्वदेश फर्केको थियो। सिसिएमसीले नेपालमा पछिल्लो समय कोरोना संक्रमणको संख्या बढेको भन्दै सम्बन्धित विभागलाई तत्कालको लागि उद्धार उडान रोक्न आदेश दिएको थियो।

क्वारेन्टाइनको निर्माणको लागि होटलको व्यवस्थापन भइनसकेकोले उद्धार उडान रोकेको थियो। युएईमा अड्किएका नेपाली नागरिक लिन जान सरकारले अनुमति दिएको नेपाल वायुसेवा निगमकी प्रवक्ता अर्चना खडकाले बताइन्। निगमको जहाजले आइतबार गएर सोमबार बिहान लिएर आउने उनले जानकारी दिइन्। खडकाले भनिन्,’ मन्त्रिपरिषद्ले निर्णय गरेर गत मंगलबारको उडानबाट नेपाल आउन नपाएका यात्रुलाई उद्धार गरेर ल्याउन अनुमतिसहितको पत्र प्राप्त गरेको छौ।’

सरकारले २ सय ६२ नेपाली नागरिकलाई उद्धार गर्न अनुमति दिएको उनको भनाइ छ। थप उडानका लागि सरकारले अनुमति दिन सक्ने उनले प्रस्ट पारिन्। सरकारको विविध प्राविधिक पक्षलाई मिलाएर नियमित उडान गर्न अनुमति दिन सक्ने उनले जानकारी दिइन्। नेपाल आउनलाई तयार रहेका युएईमा रहेका नेपाली नागरिकको उद्धार हुन नसक्दा पछिल्लो सरकारको चौतर्फी आलोचना भएको थियो।

पाँचौं चरणको चाँडै उद्धार उडान हुन नसक्दा ४२ हजार १ सय ७० अझै विदेशमा अलपत्र अवस्थामा छन्। यसभन्दा अगाडि स्वदेश फर्कन ९४ हजार १ सय ३३ नेपालीले सम्बन्धित देशको नेपाली दूतावासमा आवेदन दिएका थिए। चौथो चरण सम्ममा ५८ देशबाट ५१ हजार ९ सय ६३ नेपाली स्वदेश फर्किइसकेका छन्।