काठमाडौं । गायक दुर्गेश थापाको गीत ‘आलु जस्तो गायक’ सार्वजनिक भएलगत्तै चर्चा पाएको छ गीतको भिडियो युट्युबमा सर्वाधिक हेरिएकोमा परिरहेको छ । गीतमा वसन्त थापाले शब्दरसङ्गीत दिनुभएको छ ।
शिव विकले निर्देशन गरेको गीतमा गायक थापासँगै नायक पल शाह, पुष्प खड्का र सारिका केसीको अभिनय तथा नृत्य देख्न पाइन्छ । ‘इनाक्षी इन्टरटेन्टमेन्ट’ युट्युब च्यानलबाट सार्वजनिक गीतमा थापाको साङ्गीतिक जीवनको भोगाइ र उतारचढाव समावेश छ ।
गीतमा जनकवि केशरी धर्मराज थापाको गीतलाई ब्यङ्य गरिएको भनी आलोचना पनि भइरहेको छ । पछिल्लो समय ऋषि धमलाको कार्यक्रम ‘जनता जान्न चाहन्छन’बाट व्यापक ट्रोलको शिकार बनेका गायक थापाले रियाक्सन स्वरुप नयाँ गीत ‘आलु जस्तो गायक’ रिलिज गरेको बताइन्छ ।
‘जनता जान्न चाहन्छन’ कार्यकममा नारायणगोपालको कुनै एउटा गीत गाउनु भनेर अनुरोध गर्दा उनले भक्तराज आचार्यको गीत गाएपछि उनी रातारात विवादमा तानिएका थिए। त्यसपछि उनि व्यापक ‘ट्रोल’को सिकार बन्न पुगेका थिए ।
सोही घटनालाई केन्द्रमा राखेर दुर्गेशले नयाँ गीत रिलिज गरेका हुन्। थापाको यही वर्ष सार्वजनिक ‘बीच्चबीचमा–२’ तीज गीत पनि चर्चित छ ।
नेपालीरैबार । २०७७ भाद्र ९, मंगलवार