काठमाडौं । इंग्लीश प्रिमियर लिग फुटबलमा लिभरपुलले चेल्सीलाई २–० ले हराएको छ । गएराति चेल्सीको मैदानमा भएको खेलमा च्याम्पियन लिभरपुललाई विजयी गराउन दुबै गोल सादियो मानेले गरे ।
पहिलो हाफमै चेल्सीका डिफेन्डर क्रिश्चियनसन रातो कार्ड खाँदै मैदानबाट बाहिरिएपछि टोली १० जनामा समेटिएको थियो । हारसँगै चेल्सीलाई नयाँ सिजनको प्रिमियर लिगमा धक्का लाग्दा साविक विजेता लिभरपुलले दुई खेलमा लगातार दोस्रो जित हात पारेको छ ।
प्रिमियर लिगकै अर्को खेलमा टोटनह्याम हट्सपरले साउथह्याम्प्टनलाई ५–२ ले हरायो । टोटनह्यामको जितमा कोरियन खेलाडी हिउङ मिन सन एक्लैले ४ गोल गरे ।
गएराती लेष्टर सिटीले बर्न्लेमाथि ४–२ को जित निकाल्दा ब्राइटनले न्युकासल युनाईटेडलाई उसैको मैदानमा ३–० ले पाखा लगायो । इंग्लीश प्रिमियर लिग फुटबलमा आज दुई खेल हुनेछन् ।
मध्यराती म्यान्चेस्टर सिटीले सिजनको पहिलो खेलमा वुल्भरह्याम्पटन वान्डरर्सको सामना गर्दा एस्टन भिल्ला र शेफिल्ड युनाईटेड भिड्नेछन् ।
नेपालीरैबार । २०७७ आश्विन ५, सोमबार