काठमाडौं । नेपाल आयल निगमले डिजेल÷मटीतेलको मूल्य प्रतिलिटर एक रुपैयाँले घटाएको छ । इन्डियन आयल कर्पोरेसन (आइओसी)ले बिहीबार अक्टोवर–१० मा पठाएको मूल्य बढेर आए पनि निगमले बिहीबार रातिदेखि लागू हुने गरी डिजेल र मटीतेलको मूल्य घटाएको जनाएको छ ।

नयाँ मूल्यअनुसार डिजेल प्रतिलिटरमा एक रुपैयाँ घटेर ८९ रुपैयाँ कायम गरिएको निगमले जानकारी दिएको छ । हवाई इन्धन, पेट्रोल र खाना पकाउने एलपी ग्यासको मूल्य भने यथावत राखिएको निगमले जानकारी दिएको छ ।

मूल्य समायोजन पश्चात पनि भारतीय सीमा नाकाभन्दा नेपालमा डिजेल प्रतिलिटरमा ३४ रुपैयाँ सस्तो रहेको निगमले दावी गरेको छ । निषेधाज्ञापछि बजार खुल्ने क्रम बढ्दै जाँदा पेट्रोलियम पदार्थको खपत पनि पछिल्लो समय बढ्न थालेको निगमले जनाएको छ ।