काठमाडौं । सुडानको सरकार तथा विद्रोही समुहबीच शनिबार शान्ति सम्झौतामा हस्ताक्षर भएको छ । सम्झौताले सयौँ हजार नागरिकको ज्यान लिएको दशकौँदेखिको युद्धलाई अन्त्य गरेको छ ।
सरकार र विद्रोहीबीच करिब एक वर्षदेखि शान्तिका लागि वार्ताहरू हुँदै आएका थिए । सम्झौताका लागि विद्रोही र सरकारी प्रतिनिधि दक्षिणी सुडानको राजधानी जुबामा भेला भएका थिए जहाँ सम्झौतामा हस्ताक्षर भएको छ ।
दक्षिण सुडानी मध्यस्थता टोलीका प्रमुख तुट गात्लुआकले आज आफुहरुले शान्ति सम्झौतामा हस्ताक्षर गरेका आफुहरुको लक्ष्य पूरा भएको बताउनुभयो । सुडानमा लामो समयदेखि शासन गर्दै आएका आमार अल–बसीरलाई पदबाट हटाएपछि विगत एक वर्षदेखि सङ्क्रमणकालीन सरकार रहेको थियो ।
उक्त सरकारको प्रमुख कार्य विद्रोहीलाई राजनीतिको मूलधारमा ल्याई द्वन्द्वको अन्त्यका लागि सम्झौता गर्नु रहेको थियो । सुडानको तर्फबाट अर्धसैनिक लडाकू मोहम्मद हमदान डाग्लो र सुडानी क्रान्तिकारी मोर्चा ९एसआरएफ० का वार्ता प्रमुखले सम्झौतामा हस्ताक्षर गरेका छन् ।
चाड, कतार, इजिप्ट, अफ्रिकी संघ, यूरोपेली संघ, तथा संयुक्त राष्ट्रसंघलाई सम्झौताको साक्षी बनाइएको छ । यद्यपि सम्झौतामा ल्याउन खोजिएका डार्फर, ब्लु नाइल र कोर्दोफान क्षेत्रमा सक्रिय केही समूहले यस पहिले नै सम्झौता गरिसकेका छन् भने अझै दुई वटा समूहले भने सम्झौतामा सहभागिता जनाएका छैनन् ।
नेपालीरैबार । २०७७ आश्विन १८, आईतवार