उलानबातर (एजेन्सी)। मंगलोलियाका प्रधानमन्त्री खुरेलसुख उख्नाले पदबाट राजीनामा दिएका छन्। मंगोलियामा कोरोना संक्रमित एक महिलामाथि भएको दुर्व्यवहारको भिडियो सामाजिक सञ्जालमा भाइरल बनेपछि उनले राजीनामा दिएका हुन् ।

अन्तर्राष्ट्रिय सञ्चार माध्यमहरुका अनुसार भिडियोमा एक महिला नवजात शिशु काखमा च्यापेर माइनस २५ डिग्री सेल्सियसको चिसोमा अस्पतालका पाताला कपडा र प्लास्टिकको चप्पलसँगै देखिएकी थिइन् ।

यो भिडियो भाइरल भएसँगै मंगोलियाको राजधानी उलानबातरमा प्रदर्शन शुरु भएको थियो। प्रदर्शन शुरु भएपछि प्रधानमन्त्रीले संसदमा राजीनामा बुझाएको अन्तर्राष्ट्रिय सञ्चार माध्यमहरुले जनाएका छन् ।

समाचार अनुसार राजीनामा पत्रमा प्रधानमन्त्रीले ती महिलामाथि भएको दुर्व्यवहारको जिम्मेवारी आफूले लिने बताएका छन् । तर, संसद्ले उनको राजीनामा भने स्वीकार गरिनसेको बताइएको छ।

प्रधानमन्त्रीले राजीनामा दिनुअघि सोही प्रकरणलाई लिएर उपप्रधानमन्त्री र स्वास्थ्य विभागका उच्च अधिकारीले राजीनामा दिइसकेको जनाइएको छ। मंगोलियामा सुत्केरी महिलालाई एक महिनाभन्दा पहिला घरबाट चिसो निकाल्न नपाइने, चिसो खानेकुरा दिन नपाइने परम्परा रहेको छ ।

३० लाख जनसंख्या रहेको मंगोलिया कोरोना महामारी विरुद्ध सफलतापूर्वक लड्ने एक मुलुक हो । जसको विश्वस्वास्थ्य संगठनले पनि प्रशंसा गरेको थियो । मंगोलियामा हालसम्म १५ सयभन्दा धेरै मानिसहरु संक्रमित भएका छन् भने मृत्यु भएको छैन ।