सुर्खेत– रुकुम पश्चिमको त्रिवेणी गाउँपालिका–४ की मनकला खत्रीको हत्या प्रकरणमा नयाँ क्लु पत्ता लागेको छ। आक्रमणकारीले मनकलाको कान काटेर गहना लुटेएको भेटिएको छ।

अनुसन्धानमा खटिएका प्रहरी अधिकारीले गहनाकै लागि मनकलाको हत्या भएको हुनसक्ने बताएका छन्। ‘घटनास्थलको प्रकृति र शरीरमा लागेको घाउका आधारमा हत्या भएको देखिन्छ,’ रुकुम पश्चिमका डीएसपी ध्रुवकुमार श्रेष्ठले भने, ‘मृतकको कान काटिनु र गहनाहरु हराउनुले आक्रमणकारीले गहनाकै लागि हत्या गरेका आशंका छ।’

मनकलाको टाउकोमा धारिलो हतियार प्रहार गरेर हत्या गरेको श्रेष्ठले बताए। ‘टाउकोमा चार वटा गहिरो चोट देखिन्छ, हत्या कसले र किन गरेको भन्ने खुलेको छैन,’ उनले भने, ‘एउटा कान काटिएको र अर्काे च्यातिएको छ।’ घटनास्थलका मकै र घाँस कुल्चिएको छ। ‘घटनामा मृतकले प्रतिकार पनि गरेको देखिन्छ,’ डीएसपी श्रेष्ठले भने, ‘घटनाको अध्ययन भइरहेको छ, अनुसन्धानपछि वास्तविकता खुल्छ।’

भैंसीलाई घाँस हाल्न भन्दै गोठमा गएकी मनकलाको सोमबार राति हत्या भएको थियो। साँझ करिब ६ बजेतिर घरबाट गोठ गएकी मनकला राति अबेरसम्म नफर्किएपछि आफन्तले खोजी गर्दा मकै बारीमा मृत भेटिएकी थिइन्। घर र गोठको दूरी करिब दुई सय मिटर टाढा छ। घटनामा केही पनि पक्राउ परेका छैनन्।

त्रिवेणी गाउँपालिका वडा नं. ४ स्थायी ठेगाना भएकी मृतक हाल सोही गाउँपालिकाको वडा नंं ३ को कुरल भन्ने स्थानमा सासु आमासँगै बस्दै आएकी थिइन्। मृतकका श्रीमान् चार वर्षअघि वैदेशिक रोजगारीका लागि मलेसिया गएका छन्। उनका एक नाबालक छोरा छन्।