काठमाडौं : इंग्लिस प्रिमियर लिगमा चेल्सीले शानदार जित निकालेको छ। शनिबार राति भएको खेलमा चेल्सीले टोटनह्याममाथि ३–० को जित निकाल्यो। टोटनह्यामको मैदानमा चेल्सीलाई जित दिलाउन थिएगो सिल्भा, एनगोलो कान्टे र एन्टोनियो रुडिगरले गोल गरे। चेल्सीले तीनै गोल दोस्रो हाफमा गरेको थियो।

पहिलो हाफ गोलरहित बराबरीमा सकिएको खेलमा ४९ औँ मिनेटमा मार्को ओलन्सको कर्नरमा हेडिङमा गोल गर्दै थिएगो सिल्भाले चेल्सीलाई अग्रता दिलाए। त्यसपछि ५७ औँ मिनेटमा चेल्सीले अग्रता दोब्बर बनायो। इन्जुरी समयको दोस्रो मिनेटमा रुडिगरले गोल गर्दै चेल्सीलाई जित दिलाए। उनले टिमो वेर्नरको पासमा गोल गरेका थिए।

जितसँगै चेल्सी ५ खेलमा १३ अंक जोड्दै शीर्ष स्थानमा उक्लिएको छ। दोस्रो र तेस्रो स्थानमा रहेका लिभरपुल र म्यानचेस्टर युनाइटेडको पनि समाना १३ अंक नै छ। टोटनह्याम ९ अंकका साथ सातौं स्थानमा छ।