सुर्खेत। नेकपा एमाले सुर्खेतले जिल्लाका नौवटै पालिकाका प्रमुख तथा उपप्रमुख एवम् अध्यक्ष र उपाध्यक्षको उम्मेदवार चयन प्रक्रिया सुरु गरेको छ । गुर्भाकोट नगरपालिकाबाहेक अन्यत्र आकांक्षीको संख्या धेरै भएपछि उम्मेदवार छान्न एमालेलाई सकस परेको छ । सुर्खेतको चौकुने गाउँपालिकाको अध्यक्षका लागि निर्मला राना मगर, हरि अधिकारीको दाबी छ भने पञ्चपुरी नगरपालिकाको मेयरका लागि धनबहादुर थापा, रेशम राना मगर, भीम रावत र शान्ति खरालको दाबी छ । बराहताल गाउँपालिकामा घनश्याम पाण्डे र इन्द्र केसीको दाबी छ ।

सबैभन्दा बढी वीरेन्द्रनगर नगरपालिकामा मेयर पदका आकांक्षी धेरै देखिएका छन् । यो नगरपालिकामा अमृत विसी, कुलमणि देवकोटा, मोहनमाया ढकाल, महेन्द्र शर्मा, डिलाराम गिरी, निलकण्ठ खनाल, हरिहरनाथ योगीलगायत एक दर्जन बढीले दाबी पेश गरेका छन् । लेकबेशी नगरपालिकाको मेयरमा टिकाराम सोमै, देव राना र शान्ति छन्तेलले दाबी गरिरहँदा भेरीगंगा नगरपालिकामा भने यज्ञ ढकाल, टिकाराम सुवेदी र धनसिंह खड्काले आकांक्षा व्यक्त गरेका छन् ।

गुर्भाकोट नगरप्रमुखमा तिलक खत्रीले दाबी गरेका छन् । यो पालिकामा उनी सर्वसम्मत चयन भएर आउने सम्भावना देखिएको छ । सिम्ता गाउँपालिकामा कविन्द्रकुमार केसी, टेकेन्द्र बस्नेत र ऐनबहादुर चन्दले अध्यक्ष पदमा दाबी गर्दै आइरहेका छन् । चिंगाड गाउँपालिकामा बोधविक्रम जिसीको नाम चर्चामा छ भने बखत खत्रीले पनि अध्यक्ष बन्ने चाहना राखेको एमाले स्रोतले बताएको छ ।

‘हामीले चैत ३० गतेसम्म उम्मेदवार टुंगो लगाउन भनेका छौं । वैशाख तीन गते बस्ने जिल्ला कमिटीको बैठकमा एक महिला अनिवार्य रहने गरी तीनजनाको सिफारिस लिएर आउनु हुन्छ’, ‘अध्यक्ष अमृत विसीले भने, त्यसपछि हामीले आपसी छलफलका आधारमा उम्मेदवारको टुंगो लगाउँछौं ।’