मोहम्मद बुया तुरे, स्विडिस फुटबल क्लब माल्मो एफसीका स्ट्राइकरले सियरा लियोनस्थित आफ्नै विवाहमा सरिक हुन पाएनन्। त्यसैले उनले आफ्नो महत्वपूर्ण दिनमा आफ्ना दाइलाई दुलहा बनिदिन आग्रह गरे।

अघिल्लो महिना २६ वर्षका फुटबल खिलाडी मोहम्मद बुयाले चिनियाँ लिग छोडेर स्विडिस क्लब माल्मो एफसीसँग अनुबन्ध भए। यो सम्झौताबारे जुलाई २२ मा घोषणा भएपछि क्लबले उनलाई महत्वपूर्ण खेलको तयारीका लागि यथाशीघ्र क्लबमा आउन आग्रह गेको थियो।

यसका लागि उनको एउटै मात्र समस्या थियो। अफ्रिकाका यी स्ट्राइकरले आफ्नो विवाहको पहिले नै योजना बनाइसकेका थिए त्यसैले उनले आफ्नो निर्णय फिर्ता लिनसमेत चाहेनन् । आफ्नो नयाँ क्लबमा पनि नकारात्मक छवि पनि उनी चाहँदैनथे त्यसैले उनले दुबैतिर मिल्ने एउटा निर्णय गरे। उनका दाइले उनको सट्टा फुटबल त खेल्न सक्दैनन्, त्यसैले उनले आफ्नो विवाह दुलहा बनिदिन दाइलाई आग्रह गरे।

‘हाम्रो विवाह सियरा लियोनमा जुलाई २१ तारिखमा भयो तर म त्यहाँ थिइनँ किनभने माल्मो क्लबले मलाई छिटोभन्दा छिटो आउन भनेको थियो,’ मोहम्मद बुया तुरेले स्वेडिस न्युजपेपर एफ्टोनब्लेडेटसँग भने। ‘हामीले प्रि वेडिङ फोटोसुट गर्यौँ, त्यसैले म त्यहाँ भएको जस्तो भयो। तर वास्तवमा म आफ्नै विवाहमा थिइनँ मेरा दाइले विवाहमा गर्नुपर्ने मेरो सबै काम कारवाही गरिदिनुभयो।’

सुन्दा अचम्म लाग्ला, कतिले ‘वाहियात, कस्तो समाचार बनाएको पत्रुकार ?’ पनि भन्नुहोला तर यो साँचो हो। बुया तुरेका दाइ र उनकी श्रीमती सौवाद बेडनलाई विवाहको केक सँगै काटिरहेको देख्न सकिन्छ। त्यतिबेला ती फुटबलरलाई कहिँ कतै देखिँदैन। बुयाले आफ्नो तीनवटा फोटो सोसल मिडियामा सार्वजनिक गरेका छन् तर ती सबै विवाह अघि नै खिचिएको पनि स्पष्टिकरण दिएका छन्।

‘म मेरी श्रीमतीलाई स्विडेन नै ल्याउन चाहन्छु किनभने म उनीसँग निकै नजिक छु,’ अफ्रिकाका फुटबल खेलाडीले पत्रकारलाई भने। ‘उनी मसँग यहाँ नै बस्नेछिन्।’