सुर्खेत । नेकपा (माओवादी केन्द्र) को कर्णाली प्रदेश इञ्चार्ज भएर मातृका यादव सुर्खेत आइपुगेका छन् । वीरेन्द्रनगरमा पुगेसँगै उनले भेटघाट र छलफललाई तिव्रता दिइरहेका छन् । सुरुमा उनले सहिद परिवार, माओवादी निकट व्यवसायीदेखि प्रेस सेन्टरमा आबद्ध पत्रकारहरुसँग छलफल चलाए । यस्तै शनिबार र आईतबार तीन महिने अभियानको बारेमा बैठक चल्यो । यी अधिकांश भेटघाट, छलफलहरुमा सहभागी नेता, कार्यकर्ताहरुले माओवादीले नै नेतृत्व गरेको सरकारमाथि प्रश्न नै प्रश्न उठाए ।

उसोत् कर्णालीमा सुरुदेखिनै माओवादी नेतृत्वमा छ । बीचमा नेपाली कांग्रेसबाट जीवनबहादुर शाही मुख्यमन्त्री बने भने अहिले पुनः माओवादीकै राजकुमार शर्मा मुख्यमन्त्री छन् । मन्त्रिपरिषद्मा माओवादीको बाहुल्यता बढी नै छ । तर, कर्णाली सरकारले जनअपेक्षालाई भुलेको र सरकारले जुन स्पिडमा काम गर्नुपर्ने थियो त्यो अनुसार काम गर्न नसकेको गुनासाहरु पार्टीभित्रैबाट व्यापक रुपमा सुनिने गरेका छन् । इञ्चार्ज भएर आएका मातृका यादव सामुपनि धेरै जसोले यस्तै गुनासाहरु सुनाएका छन् ।

यतिसम्मकि शनिबार र आईतबार शुभ होटेलमा सञ्चालित बैठकमा पार्टी र सरकारको तालमेल नमिलेको कुराहरु प्रमुखताका साथ उठे । माओवादी कार्यकर्ताहरुले आफ्नै पार्टीको मुख्यमन्त्री भएपनि भेट्न मुस्किल पर्ने र कार्यकर्ताका गुनासाहरु नसुन्ने गरेको भन्दै आक्रोश पोखेका थिए । नेतृत्वमा मात्र नभई माओवादीबाट बनेका अन्य मन्त्रीहरुको विषयमा पनि यस्तै खालका कुराहरु उठेको सहभागी नेताहरु सुनाउँछन् ।

साथै बैठकमा सहभागीले मुख्यमन्त्री राजकुमार शर्मा र अन्य मन्त्रीसँग सम्पर्क समेत गर्न मुस्किल हुने बताए । नेपाली रैबारलाई प्राप्त स्रोत अनुसार प्रदेश इञ्चार्ज मातृका यादवले बिहीबार माओवादी निकट प्रेस सेन्टरमा आबद्ध पत्रकारहरुसँग छलफल गरेका थिए । उक्त छलफलमा मुख्यमन्त्री शर्माको व्यापक आलोचना भएको थियो ।

मुख्यमन्त्री शर्माले अहिलेसम्म प्रेस सल्लाहकार लगायतका महत्वपुर्ण पद खाली रहेको, मुख्यमन्त्री मिडियामैत्री नभएको, सरकार सुकुम्बासी जस्तै बनेको र अन्य मन्त्रीहरुको कार्यशैली पनि राम्रो नभएको सेन्टर निकट पत्रकारले आलोचना गरेका थिए । बैठकमा सहभागी सेन्टरका एक नेताले भनेका थिए,‘ सरकारका महत्वपुर्ण अंगमा राजनीतिक नियुक्ति गर्नुपर्नेमा वर्ष दिनसम्म खाली राखेर के गर्न खोजिएको हो ? यहाँ पार्टी र सरकारबीच कुरा नमिलेको हो कि के हो ?’

माओवादी प्रदेश अध्यक्ष विमला केसीले मुख्यमन्त्रीलाई पार्टीले कुनै हस्तक्षेप नगर्ने निर्णय गरेको बताइन् । ‘उहाँलाई कसरी काम गर्दा सजिलो हुन्छ‚ त्यही गर्नुहुन्छ,’ केसीले भनिन ।नेता कालिबहादुर मल्लले पार्टीबाट सरकारमा गएका मन्त्रीलाई सुरुमै सुझाव दिइएको बताए । उनका अनुसार पार्टीबाट गएका मन्त्रीहरूलाई एकजना स्वकीय आफु नजिकको सबै बुझेको राख्नु र बाँकी पार्टीले सिफारिस गरेका व्यक्तिलाई राख्ने र सरकारको कामकारबाहीलाई व्यवस्थित बनाउनुपर्ने भनिएको थियो ।

यद्यपि उक्त कुराको मन्त्रीहरुले कार्यान्वयन नगरेको उनको भनाइ थियो । साथै मल्लले आफुले उक्त विषयमा पटक–पटक मुख्यमन्त्रीलाई ध्यानाकर्षण गराएको पनि बताए । सोही दिन इञ्चार्ज यादवले सहिद परिवारका व्यक्तिहरुसँग पनि छलफल गरेका थिए । सहिद परिवारका व्यक्तिहरुले पनि कर्णालीमा माओवादी नेतृत्वको सरकार भएको अनुभुति गर्न नपाइएको गुनासो राखेका थिए ।

अरु त त्यस्तै हो पार्टीका प्रदेश कमिटी पदाधिकारीका समेत कुराहरुको सुनुवाई नहुने शनिबार बैठकमा सहभागी एक नेताले राखेका थिए । साथै माओवादीबाट सरकारका पुगेका मन्त्रीहरुले भाषण गर्दा आफ्नो पदिय जिम्मेवारी बिर्सिने गरेको आरोप लागेको छ । केही समयअघि डोल्पामा आयोजित एक कार्यक्रमका सहभागी जलस्रोत तथा उर्जा मन्त्री उर्मिला विश्वकर्माले गैर–सांसदलाई मन्त्री बनाउने तयारी भइरहेको भन्ने जस्तो अभिव्यक्ति दिएकी थिइन् । माओवादीले गैर–सांसदलाई मन्त्री बनाउने खेल खेलिरहेकोले आफ्नो मन्त्री पद पनि कति सम्म रहने हो नरहने हो एकिन नभएको मन्तव्य दिएकी थिइन् ।

माओवादीबाट नै मन्त्री बनेको व्यक्तिले यस्तो अभिव्यक्ति दिएपछि एक किसीमको तरङ्ग नै पैदा भएको थियो । यद्यपि संसदीय दलभित्र भने उक्त विषयबारे कुनै छलफल र कुरा नउठेको माओवादीका एक सांसदले बताए । प्रदेश इञ्चार्ज यादवले प्रदेश सरकारमा देखिएका समस्याको विषयमा सम्बन्धीत पक्षसँग बसेर सल्लाह गर्ने बताए । सरकारबारे उठेको प्रश्नको मुख्यमन्त्री शर्माले पार्टीकै बैठकमा जवाफ दिएको स्रोतको भनाइ छ । शर्माले पार्टीलाई नै उचाईमा पुग्नेगरी काम गर्ने प्रयास गरिरहेको र रोजगारीका कुरामा आफ्नो ध्यान बढी केन्द्रित भएको बताएका थिए ।

दुई दिनको बैठकले पार्टीबाट तिनवटै सत्ता निर्देशित हुने, माओवादीको नेतृत्वमा रहेका स्थानीय तहमा एउटा नमुना काम गर्ने, तोकेको फिल्डमा नेता, कार्यकर्ता जानै पर्ने, भ्रष्टाचारविरुद्ध प्रदेशको मुख्यमन्त्री पनि निर्मम भएर लाग्नुपर्ने निष्कर्ष निकालिएको थियो । -सुर्खेतबाट प्रकाशित प्रदेश रैबारमा समाचार प्रकाशित भएको छ ।