सुर्खेत । नेकपा एमाले कर्णाली प्रदेश अधिवेशनका लागि दुई वटा गुटबीच कडा प्रतिस्पर्धा हुने देखिएको छ । आ–आफ्नो गुटबाट नेतृत्व बनाउनका लागि दुईवटा गुटबीच प्रतिष्ठानको लडाइँ नै छ । नेतृत्वका लागि स्थायी कमिटी सदस्यद्धय यामलाल कँडेल र गोरख बोगटी गुटबीच रस्साकस्सी नै चलेको हो । बोगटी टिमका डिजाइनकर्ताको भूमिकामा वर्तमान अध्यक्ष विनोदकुमार शाह रहेका छन् । शाहले बोगटी भन्दा आफु शक्तिशाली भएको कुरा आफ्ना नजिकका व्यक्तिहरुबाट बाहिर प्रचार गर्न समेत लगाइरहेकाे  एक नेताले बताए ।

‘बाहिर देखिने बोगटी हुन्, भित्रको डिजाइनकर्ता र पावरफुल शाह हुन,’ शाह निकट ति नेता भन्छन् । शाहले बोगटीलाई ब्याक गराएर आफु गुटको नेता बन्न खोजिरहेको ती नेताको भनाइ छ । यतिसम्मकी ती नेताले शाह टिम कर्णालीमा बलियो रहेको कुरा समेत सुनाए । पदाधिकारीका लागि अहिले कँडेल भर्सेस बोगटी–शाह गुटबीच प्रतिष्ठाको लडाइँ नै हुने नेताहरुको बुझाइ छ ।

लुम्बिनीमा विष्णु पौडेल र शंकर पोखरेलबीच प्रतिस्पर्धा भएपनि कर्णालीमा शंकर पोखरेल गुटभित्रनै उपगुट जन्मेको हो । यहाँ पौडेलको टिम छैन । यद्यपि पछिल्लो समय बोगटी–शाह गुटमा युवा नेताहरु उभिएको स्रोतको दाबी छ । यसअघि अध्यक्षका लागि नाम चर्चामा आएका विष्णु रिजाल, निरज आचार्य पनि बोगटी–शाह टिममा समावेश भएको एक नेताको दाबी छ ।

कँडेल गुटबाट पोलिटब्युरो सदस्य गुलाबजंग शाह, धुर्वकुमार शाही अध्यक्षका लागि दाबेदार छन् भने बोगटी–शाह गुटबाट लालबहादुर महतारा र मिनबहादुर शाहीको नाम चर्चामा छ । अन्तिममा कालीकोटका मीनबहादुर शाही र सल्यानका गुलावजंग शाहबीच टक्टर हुने संम्भावना रहेको नेताहरु बताउँछन् । शाह पोलिटब्यूरो सदस्य हुन् ।

तर, पुर्व सभामुख राजबहादुर शाहीले अध्यक्षको उम्मेदवारबाट ‘ब्याक’ नहुने बताइरहेका छन् । उनी अहिलेसम्म कुनै पनि गुटको उम्मेदवार नबन्ने र एक्लै भएपनि प्रतिस्पर्धा गर्ने बताइरहेका छन् ।एक प्रदेश स्तरिय नेताका अनुुसार सर्वसम्मत तरिकाले गएको खण्डमा गुलावजं शाह अध्यक्ष बन्ने निश्चित जस्तै छ । तर, नेताहरुको अडानका कारण चुनाव हुने सम्भावना पनि उत्तिकै रहेको ती नेताको भनाइ छ ।

चुनावै भएको खण्डमा कँडेलले सुर्खेतका धुर्व शाही भन्दा सल्यानका शाहलाई नै अगाडि सार्ने सम्भावना रहेको ती नेता बताउँछन् । ‘अहिले धुर्व जीलाई अध्यक्ष भन्दा तलको पदाधिकारीका लागि ‘कन्भिन्स’ गर्ने प्रयास भइरहेको छ,’ ती नेता भन्छन्,‘ कँडेल ज्यूले अहिले धुर्व भन्दा शाहजीलाई धेरै सपोर्ट गरेको देखिन्छ ।’

तर, बाहिरी रुपमा कँडेललाई त्यत्ति राम्रो नमान्ने एमालेभित्रै चर्चा छ । ‘भित्र कँडेलको निर्णयको दायाँबायाँ गर्नुहुन्न, उहाँ बाहिर रुपमा कँडेल भन्दा आफुलाई नै बढ्ता नेता ठान्नुहुन्छ,’ कँडेल पक्षका एक नेता भन्छन्,‘ यद्यपि तत्कालिन नेकपा हुँदा कर्णाली सरकारमा देखिएको सत्ता संघर्षको बेलामा शाहले कँडेललाई भरपुर सहयोग गरेका थिए ।’ यदी शाह अध्यक्षको उम्मेदवार बने यो गुटबाट उपाध्यक्ष टेकराज पछाई, सचिवमा धुर्व शाही, उपसचिवमा रबिन्द्रराज शर्मा, सुशील थापा र जीतबहादुर मल्लमध्ये एक जना आउने सम्भावना रहेको छ ।

उता बोगटी–शाह टिमबाट अध्यक्षमा मिनबहादुर शाही उम्मेदवार बन्ने सम्भावना प्रबल रहेपनि त्यो भन्दा तलको पदाधिकारीका लागि कसलाई अघि सार्ने भन्ने विषयमा गृहकार्य भइरहेको सो गुटका एक नेताले बताए । राजबहादुर शाहीलाई भने कँडेल र बोगटी–शाह दुबै गुटले उम्मेदवारको रुपमा स्वीकार गरिरहेको देखिन्न । तर, शाहीभने असन्तुष्ट नेता, कार्यकर्ताको प्रतिनिधित्व गर्ने बताइरहेको छन् ।

चुनाव हुने सम्भावना कति ?

एमाले कर्णाली प्रदेश इञ्चार्ज लेखराज भट्टले कर्णालीमा सकेसम्म सर्वसम्मत तरिकाले अधिवेशन सम्पन्न गरिने बताए । यद्यपि नेताहरुले आ–आफ्ना अडान नछाडेपछि चुनाव हुने सम्भावना पनि उत्तिकै रहेको संकेत उनले दिए । ‘हाम्रो प्रयास सर्वसम्मत नै हो,’ उनले भने,‘ नभए लोकतान्त्रिक विधिबाट जाने कुरा भैहाल्यो नै । त्यो कुरा १० गतेसम्म नै थाह होला ।’

तर, एमालेका एक नेताका अनुुसार अध्यक्ष केपी ओली र शंकर पोखरेलले नै आएर फलानालाई सर्वसम्मत बनाउ भनेर सबैलाई राखेर भनेको खण्डमा त्यो लागु हुनसक्ने सम्भावना पनि उत्तिकै रहेको बताए । वीरेन्द्रनगरको सिटी हलमा गरिने कार्यक्रमको तयार तीव्र रुपमा भइरहेको छ । एमाले अध्यक्ष ओलीले अधिवेशनको उद्घाटन गर्ने छन् ।