सुर्खेत ।  सुर्खेतको चिङ्गाड गाउँपालिकामा वडा स्तरिय भलिबल छनौट प्रतियोगिता भब्यताका साथ सम्पन्न भएको छ । चिङ्गाड खेलकुद विकास समिति सुर्खेतको आयोजनामा कार्तिक २० गते संचालित प्रथम चिङ्गाड गाउँपालिका अध्यक्ष कप वडा स्तरिय भलिबल छनौट प्रतियोगिता कार्तिक २१ गते सम्पन्न भएको हो ।

प्रतियोगितामा गाउँपालिकाका वडा नं.१ देखि ६ सम्मका टिमको सहभागिता रहेको थियो । जसमा वडा नं.२ विजेता बन्दा वडा नं.३ उपविजेता बनेको छ । बिजेता टिमलाई ट्रफी, मेडल र प्रमाणपत्र वितरण गरिएको आयोजक समितिका संयोजक टोप बहादुर बिसीले जानकारी दिए । उनका अनुसार प्रतियोगिताबाट १६ जना खेलाडी छनौट भएका छन् भने बन्द प्रशिक्षण संचालन गरिने भएको छ । खेलाडी छनौटका लागि मोतिराम रम्तेल लगायत ३ जनाको निर्णायक समिति रहेको थियो ।

उद्घाटन कार्यक्रममा चिङ्गाड खेलकुद विकास समिति सुर्खेतका संयोजक टोप बहादुर बिसीको अध्यक्षता रहेको थियो भने गाउँपालिका अध्यक्ष बोध विक्रम जिसीको प्रमुख आतिथ्यता रहेको थियो । त्यस्तै गाउँपालिका उपाध्यक्ष मिना कुमारी रोकाय र प्रमुख प्रशासकिय अधिकृत मणिराम खरेलको विशेष आतिथ्यता रहेको थियो । कार्यक्रममा राजनैतिक दल, संघ संस्थाका प्रमुख तथा प्रतिनिधिका साथै शिक्षक, अभिभावक, सुरक्षाकर्मी, पत्रकार लगायतको उपस्थिति रहेको थियो ।