सुर्खेत । हाम्रो कर्णाली बहुउद्धेश्यीय सहकारी संस्था लि.को ५ औँ वार्षिक साधारण सभा सम्पन्न भएको छ । शनिबार सिद्धार्थ संचार सहकारी संस्थाको हल विरेन्द्रनगर सुर्खेतमा साधारण सभा सम्पन्न भएको हो ।
सभामा सहकारीका अध्यक्ष सुर्य थापाले आ.ब.२०८०।०८१ को प्रगति प्रतिवेदन तथा आ.ब.२०८१।०८२ को नीति तथा कार्यक्रम प्रस्तुत गरेका थिए । संस्थाको शेयर पुजीँ ६३ लाख ८१ हजार सात सय रहेको छ । संस्थाको आ.ब.२०८०।०८१ वित्तीय अवस्थाका अनुसार जगेडा कोषमा एक लाख ६५ हजार ७७२ रुपैयाँ ९१ पैसा, कर्जा लगानी दुई करोड १२ लाख २० हजार ३५३ रुपैयाँ, कुल बचत एक करोड ७५ लाख ९५ हजार ९९ रुपैयाँ २५ पैसा र कुल सम्पत्ति दुई करोड ५१ लाख ९६२ रुपैयाँ ७५ पैसा रहेको छ ।
चालु आ.ब.भित्र चुक्ता पुँजी ८० लाख पुर्याउने लक्ष्य राखिएको अध्यक्ष सुर्य थापाले बताए । उनका अनुसार एक हजार ३२१ जना शेयर सदस्य रहेको सहकारीमा यस बर्ष १६ सय जना पुर्याउने लक्ष्य राखिएको छ ।
सभामा आर्थिक बर्ष २०८१।०८२ को लागी प्रस्तावित लक्ष्य तथा बजेट कोषाध्यक्ष पद्मा बिष्टले प्रस्तुत गरेकी थिइन । प्रस्तुत प्रतिवेदनमा यस आ.व.को अन्त्यसम्मा बचत संकलन दुई करोड ३० लाख ७७ हजार ५ सय ८ रुपैयाँ र ऋण लगानी ३ करोड २० लाख पुर्याउने लक्ष्य राखिएको छ । यस्तै, चालु आ.व.को अन्त्य सम्म आम्दानीलाई ५० लाख ७२ हजार ६६ रुपैयाँ पुर्याउने र खर्चलाई ४० लाख ४ सय ८९ रुपैयाँमा समित राख्ने लक्ष्य राखिएको कोषाध्यक्ष पद्मा बिष्टले बताइन् ।
यस्तै, साधारण सभाका अवसरमा संस्थाले उत्कृष्ट बजार प्रतिनिधि एक जना, उत्कृष्ट बचतकर्ता एक जना र ज्येष्ठ नागरिक कर्मचारी एक जना गरी ३ जनालाई सम्मानित गरेको छ । सम्मानित ३ जनालाई कर्णाली प्रदेशका सामाजिक विकास मन्त्री घनश्याम भण्डारीले मायाको चिनो, प्रमाणपत्र र नगद हस्तान्तरण् गरी सम्मान गरिएको अध्यक्ष थापाले बताए ।
संस्थाका अध्यक्ष सुर्य थापाको अध्यक्षता रहेको सभामा कर्णाली प्रदेशका सामाजिक विकास मन्त्री घनश्याम भण्डारीको प्रमुख आतिथ्यिता रहेको थियो । सभाको संचालन संस्थाका सचिव गणेश कञ्चन भारतिले गरेका थिए ।
मनिसा गौतम । २०८१ मंसिर २२, शनिबार