काठमाडौं । नेपाल प्रिमियर लिग एनपीएल क्रिकेटमा पोखरा एभेन्जर्सले विराटनगर किङ्ग्सलाई ‘सुपर ओभर’ मा हराउँदै दोस्रो जीत हात पारेको छ । पोखराले विराटनगरलाई १३ रनले हरायो । ‘सुपर ओभर’ मा पोखराले दिएको १९ रनको लक्ष्य पछ्याएको विराटनगरले ५ रनमात्र बनाउन सक्यो । यसअघि विराटनगरले दिएको १ सय ४० रनको लक्ष्य पछ्याएको पोखराले २० ओभरमा ६ विकेट गुमाएर १ सय ३९ रन बनाएपछि खेल ‘सुपर ओभर’ मा पुगेको हो । एनपीएलमा यो पहिलो ‘सुपर ओभर’ हो ।

पोखराका आन्द्रेस गौसले ३९, रेमोन रेफरले नटआउट ३४ रन बनाए । विराटनगरका प्रतिस जिसीले ४ विकेट लिए । यसअघि कीर्तिपुरको त्रिवि क्रिकेट मैदानमा टस जितेर ब्याटिङ गरेको विराटनगरले २० ओभरमा ७ विकेट गुमाएर १ सय ३९ रन बनायो । विराटनगरका स्कट इडवार्ड्सले ४५ रन बनाए । पोखराका सागर ढकाल र रेमोन रेफेरले २र२ विकेट लिए ।

यो जीतसँगै पोखरा ५ खेलमा ४ अङ्कसहित तालिकाको छैटौं स्थानमा छ । विराटनगर ५ खेलमा २ अङ्कसहित पुछारमा छ । एनपीएलमा आजको दोस्रो खेलमा दिउँसो १ बजे जनकपुर बोल्ट्स र काठमाण्डौ गुर्खाज खेल्दैछन् । जनकपुर तालिकाको दोस्रो र काठमाण्डौ पाँचौं स्थानमा छन् ।