रुकुम पश्चिम । राप्ती राजमार्गअन्तर्गत रुकुम पश्चिमको त्रिवेणी गाउँपालिका २ सिम्रुतु नजिकै बिहीबार बेलुका भएको मिनी ट्रक दुर्घटनामा घाइते चालकको मृत्यु भएको छ ।

जिल्ला प्रहरी कार्यालय रुकुम पश्चिमका प्रहरी नायब उपरीक्षक प्रमेश बिष्टका अनुसार दुर्घटनामा परेर दाङ घोराही उपमहानगरपालीका १० निवासी ४५ वर्षीय चालक भुपेन्द्र महतको मृत्यु भएको छ । उनको उपचारको क्रममा बिहीबार राति नै जिल्ला अस्पताल सल्लेमा मृत्यु भएको हो । सोहि दुर्घटनामा परेर घाइते भएका दाङको घोराही उपमहानगरपालिका १० निवासी ३४ वर्षीय सहचालक सुन्दरकुमार बुढाको अवस्था पनि गम्भीर रहेको अस्पतालले जनाएको छ । उनलाई थप उपचारका लागि रातिनै नेपालगञ्ज रिफर गरिएको छ ।

दाङको घोराहीबाट पानीको जार र बोतल बोकेर आउँदै गरेको रा १ क १४१२ नम्बरको मिनी ट्रक ब्रेक फेल भएर दुर्घटना भएको थियो । रारा प्रोसेसिङ कम्पनी प्रालिद्वारा सञ्चालित मिनि ट्रक दाङबाट रुकुम पश्चिमको खलंगातर्फ आउँदै गरेको बेला दुर्घटना भएको हो । ट्रक ब्रेक फेल भई दुर्घटना हुँदा सडकभन्दा दुई सय मिटर तल खसेको प्रहरीको भनाइ छ ।