सुर्खेत । वीरेन्द्रनगरस्थित तातापानीमा रहेको साउथ एशियन स्कलर्स एकेडेमीले आफ्ना कर्मचारीहरुलाई लकडाउन अवधिको तलव दिएको छ । कोरोना महामारीको कारण देखाउँदै आफ्ना कर्मचारीलाई तलव नदिएका अन्य नीजि विद्यालयहरुलाई चुनौती दिँदै साउथ एशियनले उदाहरणिय कार्य गरेको भन्दै चर्चा भइरहेको हो ।
कतिपय नीजि विद्यालयहरूले भने लकडाउनकाे तलव दिन नसक्ने भन्दै विद्यालयमा कार्यरत शिक्षक र शिक्षिकालाइ निकालेका छन् ।
तर ज्ञान सिन्धु सुर्खेत कलेज समेत सञ्चालन गरिएको एकेडेमीले एकसय ३१ जना कर्मचारीलाई तलव दिएको निर्देशक एवम् कार्यकारी प्रमुख छत्र बडुवालले जानकारी दिए ।
विद्यालयमा कार्यरत शिक्षक, शिक्षिका एवं कर्मचारीलाई लकडाउन अवधि सहित असोज मसान्तसम्मको सम्पुर्ण तलब दिएको बडुवालको भनाई छ ।
अन्य नीजि विद्यालयमा कार्यरत शिक्षक र शिक्षिकाहरु आन्दोलनमा उत्रिएको बेला साउथ एशियनले आफ्नो उच्च शैक्षिक निष्ठता कायम बनाएको भन्दै सामाजिक सञ्जालमा प्रशंसा गरिएको छ ।
‘देशको भविष्य उज्ज्वल बनाउन अहोरात्र खटिने शिक्षक, शिक्षिका एवं कर्मचारीहरुलाई तलब दिएको हुँ’ बडुवालले भने, ‘नीजि विद्यालय नाफाका लागि मात्रै खोलिएका हुन भन्ने भ्रम चिर्न सफल भएको छु ।’
नेपालीरैबार । २०७७ कार्तिक ६, बिहीबार