अफगानिस्तानबाट अमेरिकी सैनिकहरू हटेपछि तालिबानले आफ्ना विरोधीहरूको गढका रूपमा रहेको पंजशिर उपत्यकामा आक्रमण गरेको छ । पंजशिरमा तालिबानविरोधी ताजिक नेता अहमद मसूद निकटका मानिसले अफगानिस्तानको टोलो न्युजसँग कुरा गर्दै तालिबानले मंगलवार साँझ पंजशिरको एक चौकीमा आक्रमण गरेको बताए ।
आफ्ना लडाकूहरूले यस तालिबानी आक्रमणलाई विफल तुल्याएको तिनले बताए । दुवै पक्षबीच युद्ध जारी छ । तालिबानले यस आक्रमणका विषयमा टिप्पणी गरेको छैन । तालिबानको आक्रमण जाबुल सिराज इलाकामा भएको हो । त्यो परवान प्रान्तमा पर्छ । आक्रमणमा कैयौं लडाकू मारिएको र घाइते भएको बताइएको छ ।
तालिबानले पंजशिरलाई चारैतिरबाट घेरेको छ र इन्टरनेट बन्द गरेको छ । अहमद मसूदका समर्थकहरूलाई संसारसँग सम्पर्क कायम गर्न नदिन इन्टरनेट काटिएको हो । अहमद मसूद र तालिबानबीच सम्झौताका लागि कुराकानी भएको खबर पनि आएको थियो । तर त्यो कुराकानी विफल भएको जस्तो देखिएको हो ।
पंजशिरमै अफगानिस्तानका उपराष्ट्रपति अमरुल्लाह सालेह छन् । पूर्व राष्ट्रपति अशरफ गानी देश छोडेर भागेपछि सालेहले आफूलाई संविधानतः कार्यवाहक राष्ट्रपति घोषणा गरेका थिए । तर सालेहको घोषणालाई संयुक्त राष्ट्रसंघले मान्यता दिएको छैन ।
एजेन्सी । २०७८ भाद्र १५, मंगलवार