सुर्खेत । वीरेन्द्रनगरमा रहेको खुलामञ्चमा गत वर्ष तीजकाे दिन मान्छेले भरिभराउ भएकाे िथयाे । यहाँ रातो पहिरनमा सजिएका महिला, युवतीको बाक्लो भीड छिचोल्न गाह्रै पर्थ्यो।नगरपालिकाअन्तर्गतका १६ वटै वडाका स्थानीयको सहभागितामा तीज विशेष कार्यक्रम स्वर्तस्फूर्त आयोजना हुन्थ्यो।

सुर्खेतका वरिष्ठ कलाकार प्रेमदेव गिरी सम्झन्छन्, ‘तीजका बेला खुलामञ्चमा भव्य मेला लाग्थ्यो। टाढा–टाढाबाट चेलीबेटीहरु आउँथे। ब्रतालुको भीड नै लाग्थ्यो। परम्परागत वेशभूषा तथा तीज गीतका लय सुनिन्थे। चेलीबेटीका वेदना सुनिन्थे।’

तीजमा सधैं हजारौं ब्रतालुको साथ पाउने खुलामञ्च भने यसपालि दुई सय क्षमताको आइसोलेसन सेन्टरका रूपमा परिणत भएको छ।

कोरोना भाइरस (कोभिड–१९) संक्रमण जोखिम नियन्त्रणका लागि वीरेन्द्रनगरमा भदौ ९ गते राति १२ बजेसम्म निषेधाज्ञा जारी छ। अत्यावश्यक कामबाहेक घरमै बस्न नागरिकलाई प्रशासन अनुरोध गरिरहेको छ।

वरिष्ठ वाद्यबाधक ज्ञानबहादुर नेपाली भन्छन्, ‘अहिले हामी पनि घरमै छौं। कोरोना संक्रमणको जोखिमका कारण वर्षौंदेखि तीज विशेष बनाउने खुलामञ्चमा यसपालि भने कोही जाने छैनन्।’

तीजका अवसरमा ब्रत बसेका ब्रतालु चौरभर धुलो उडाएरै नाच्थे। समूह–समूहमा विभाजन हुने ब्रतालुका आफ्नै मादले ताल हुन्थ्यो। सुरिलो स्वरसँग मिसिएर पुराना तीजका भाका आउँथे।

नेपालीले भने, ‘१० वर्षयता पहिलोपटक खुलामञ्चले चेलीको वेदना सुन्न पाएन।’ खुलामञ्चमा पोखिने वेदना बोल्ने पाउजुका ‘छमछम’ सुनिएन।

तीजका समयमा खुलामञ्चमा स्वतस्फूर्त रूपमा समूहगत सञ्चालन हुने कार्यक्रममा १० वर्षयता उत्कृष्ट प्रस्तुति छनोट गरिरहेको सुर्खेतको वागिना समूहले भने यसपालि खुलामञ्चमा नभई इन्टरनेटको माध्यमद्वारा तीज विशेष कार्यक्रम आयोजना गरेको छ।

बागिना समूहका अध्यक्ष गोविन्द कोइरालाले भने, ‘कोरोना भाइरस संक्रमण जोखिमले खुलामञ्च र चौतारीमा तीज विशेष कार्यक्रमको आयोजना भएका छैनन्। तर हाम्रो मौलिक पर्व तथा संस्कृति जगेर्नाका लागि हामी इन्टरनेटको माध्ययबाट कार्यक्रमको आयोजना भने गरेका छौं।’

उनले भने, ‘तीजका दिन वीरेन्द्रनगरका लागि विशेष मानिने खुलामञ्चमा अहिले आइसोलेसन छ। निषेधाज्ञाले नागरिकहरू घरमै बसेका छन्। कोरोनाको जोखिम बढ्दो अवस्थामा छ। यसैलाई मध्यनजर गर्दै हामीले प्रविधि प्रयोग गरेर तीज मनाउन लागेका हौं।’

वागिना समूहका कलाकारहरूले घरैबाट तीज विशेष प्रस्तुतिहरू दिएका छन्। घरमा रहेका नागरिकलक्षित गर्दै सामाजिक सञ्जालमार्फत वागिनाले तीज विशेष प्रस्तुति दिएको हो। पुनम विसीको सहयोगमा  ।