इस्लामाबाद। पाकिस्तानमा २४ घन्टायता भएको निरन्तरको वर्षा र त्यसपछि आएको बाढीमा परेर कम्तीमा पनि ३६ जनाको ज्यान गएको छ।
उद्धारमा खटिएका अधिकारीले दिएको जानकारीअनुसार पाकिस्तानको दक्षिणी सिन्ध प्रान्त सबैभन्दा बढी प्रभावित भएको छ।
यो प्रान्तमा मात्र १८ जनाको मृत्यु भएको छ भने अन्यत्र सय जनाभन्दा बढी घाइते छन्। त्यसैगरी पाकिस्तानको उत्तरपश्चिमी खैबर पख्तुनख्वामा पनि बाढीको प्रकोप बढेको छ। सो प्रान्तमा गएको २४ घन्टायता बाढीमा परेर कम्तीमा पनि ११ जनाले ज्यान गुमाएका छन्।
ती दुई प्रान्तमा वर्षा जारी रहेकाले बाढीको थप प्रकोप बढ्न सक्ने भन्दै सतर्क रहन सरकारले सूचना जारी गरेको छ। यहाँको राष्ट्रिय प्रकोप व्यवस्थापन निकायले क्षतिको विवरण आउन बाँकी रहेको बताएको छ।
उक्त निकायले गएको २४ घन्टामा पाकिस्तानका कैयौँ क्षेत्रमा बाढी र वर्षा आएको भन्दै शनिबार बिहानैदेखिको वर्षा अविरल रूपमा आइतबार बिहानसम्म आएकाले अरू पनि क्षति भएको अनुमान गरिएको छ।
विवरणहरू आउन बाँकी रहेको उक्त निकायले जनाएको छ। पछिल्लो वर्षा र बाढीले २० हजारभन्दा बढी घर भत्किएका छन्। यो मनसुनी वर्षामा मात्र पाकिस्तानमा सात सयभन्दा बढीको ज्यान गएको छ। यसमा परेर हजारौँ व्यक्ति घरबारविहीन भएका बताइएको छ।
एजेन्सी । २०७९ भाद्र ५, आईतवार