सुर्खेत। सुर्खेत उद्याेग बाणिज्य संघकाे पहलमा नीजि वायु सेवा कम्पनी वुद्ध एयरले सुर्खेतमा परीक्षण उडान गरेको छ । एटिआर ४२ मार्फत नियमित उडान गर्दै आएको वुद्धले बुधबार एटीआर ७२ विमानमार्फत सुर्खेत विमानस्थलमा परीक्षण उडान गरेको हो ।
सानो जहाज चढ्दा हवाई भाडा महंगो भएको र कर्णालीबासीले विमान चढ्न नेपालगञ्ज नै पुग्नु पर्ने बाध्यता देखिएपछि वुद्धको एटीआर ७२ लाई नियमित उडान गर्नेगरी परीक्षण उडान गर्न पहल गरिएकाे संघका अध्यक्ष लक्ष्मण कँडेलले जानकारी दिए । उनकाअनुसार एटीआर ७२ जहाजकाे रिपाेर्ट सकरात्मक नै आउने र कर्णालीबासीले सस्ताे भाडामा सुर्खेत-काठमाडाैं-सुर्खेत नियमित उडान हुनेमा नीजि क्षेत्र आशावादी रहेकाे छ।
चालकदलका सदस्यसहित वुद्ध एयरका कर्मचारी र नेपाल नागरिक उड्डयन प्राधिकरणको टोली नेपालगञ्जबाट सुर्खेत विमानस्थलमा अवतरण गरेको थियो । एटीआर ७२ जहाजमार्फत परीक्षण उडान सफल भएको र प्राधिकरणकाे रिपोर्टपछि आगामी पुसदेखि नियमित उडान गर्ने पाईलट प्रमोद थापाले बताए ।
उनले सानो जहाजमार्फत उडान गर्दा भाडादर महंगो भएकाले यात्रुहरुको मागअनुसार एटीआर ७२ जहाजमार्फत सेवा दिन परीक्षण उडान गरिएको उल्लेख गरे । सुर्खेत विमानस्थल उडान अनुकुल रहेको अवस्थामा एटीआर ७२ जहाजमार्फत दैनिक दुई उडान गर्ने र न्यूनतम भाडादर सातहजार पाँचसय कायम गरिने वुद्ध एयरले जनाएको छ ।
नेपालीरैबार । २०७९ कार्तिक ३०, बुधबार