दैलेख । शिक्षकको हत्या गर्नेलाई एक महिलालाई दैलेख जिल्ला अदालतले जन्मकैदको फैसला सुनाएको छ । अदालतले गुराँस गाउँपालिका–८ मकुटककी २८ वर्षीया मुना राना खड्कालाई जन्मकैदको फैसला गरेको हो । जिल्ला न्यायाधीश बलराम लम्सालको इजलासबाट मुनालाई जन्मकैद फैसला भएको अदालतका श्रेस्तेदार इन्द्रबहादुर कार्कीले बताए । फैसलामा मुनाले जन्मकैद कारागार बस्नुपर्ने, पीडित पक्षलाई एक लाख रुपैंयाँ क्षतिपूर्ति तिर्नुपर्ने र पीडित राहत कोषमा दुई हजार आठ सय रुपैंयाँ जम्मा गर्नुपर्ने उल्लेख छ ।

याे पनि पढ्नहाेस् : व्यक्तिगत रिसिवीका कारण शिक्षक विसीको हत्या, महिलाले लिइन हत्याको जिम्मा

मुनाले आफ्नै छिमेकी मालिका मावि लालीकाँडा मकुटकमा कार्यरत शिक्षक ४२ वर्षीय नगेन्द्रबहादुर बिसीको २०७८ भदौ २९ गते राति धारिलो हतियार प्रयोग गरि हत्या गरेकी थिइन् । बयानका क्रममा मुनाले आफू माथि यौनजन्य दुव्र्यवहार भएपछि धारिलो हतियार चक्कु प्रहार गरी हत्या गरेको स्वीकार गरेकी थिइन् ।

याे पनि पढ्नुहाेस् : शिक्षक हत्या घटना : शंकास्पद दुई व्यक्तिलाई दैलेख लगियो

घटनाताका बेला हत्या गरिएका शिक्षक बिसीका दुई छोरा अध्ययनको शिलसिलामा बाँकेको कोहलपुरमा थिए । घटनाकै दिन शिक्षक बिसीको श्रीमती कृष्णाकुमारी काम विशेषले दैलेख सदरमुकाममा थिइन् । शिक्षक बिसीले घर नजिकै आफ्नो दिदीको घरमा साँझको खाना खाईसकेपछि मुनाको देवरले चलाएको पसलमा राति ११ बजेसम्म बसेर घर फर्किने क्रममा आफु सुतेको कोठामा पुगी यौन दुव्र्यवहार गरेको मुनाको आरोप छ । मुनाले आफुसंगै सुतेका छोराहरुलाई थाहा नहोस् भनेर शिक्षक बिसीलाई साथमा लिई आफ्नै घरसंग जोडिएको मालिका माविको हातामा चक्कु प्रहार गरेको प्रहरी र अदालतमा एकै प्रकारको बयान दिएकी थिइन् ।

याे पनि पढ्नुहाेस् : दैलेखमा शिक्षकको घाँटी रेटेर हत्या, शंकास्पद व्यक्ति प्रहरीकाे निगरानीमा

मुनाका श्रीमान २५ वर्षीय डम्बर खड्कालाई भने अदालतले सफाई दिएको छन् । सुर्खेतमा रहेका श्रीमानलाई मुनाले हत्या घटना लगत्तै मोबाइलबाट जानकारी गराएको बेला ‘भागेर आऊ म लुकाउने प्रयास गरौंला’ भनेर म्यासेज गरेको आधारमा डम्बरलाई समेत हत्या अभियोगमा कारागार थुनामा राखिएको थियो । ‘लुकाउने प्रयास गरौंला’ भनेर मुनालाई म्यासेज लेखेकै आधारमा हत्या अभियोगमा डेढ वर्षदेखि थुनामा रहेका खड्काले सफाई पाएका हुन् ।

शिक्षक बिसीको हत्यामा संलग्न मुनाको परिवार भने विस्थापित छ । घटना भएयता पीडित परिवारले हत्याका आरोपित मुनाका परिवारहरुलाई आफ्नो घरमा बस्न नदिएको कारण डेढ वर्षदेखि विस्थापित हुनु परेको इन्सेक प्रतिनिधि अमर सुनारले बताए । बुहारीले शिक्षक हत्या गरेपछि गुराँस गाउँपालिका–८ छोटेपोखराका नवलसिंह खड्का, नवलसिंहकी श्रीमती डिलसरा खड्का, कान्छो छोरा दीर्घबहादुर खड्काको ४ जनाको परिवार समेत ६ जना विस्थापित छन् ।

आफ्नो घरमा बस्न कोशिस गर्नैपर्छ भनेर गत मंसिर २५ गते घर पुगेका मुनाका सासुससुरा नवलसिंह र डिलसरालाई मृतक शिक्षक नगेन्द्रको श्रीमती कृष्णाकुमारी र बुहारीले कालोमोसो दलेर दुव्र्यवहार गरेको स्थानीयको भनाई छ । नवलसिंहले आफ्नो घरमा बस्न पाउनु पर्ने भन्दै स्थानीय तहका जनप्रतिनिधि, प्रहरी र राष्ट्रिय मानव अधिकार आयोगमा लिखित र मौखिक उजुरी गरेका छन् ।