सुर्खेत। जिल्लाभित्र पर्ने कर्णाली कोरिडोर र आन्तरिक सडकमा यातायात सेवा अझै सञ्चालनमा आउन सकेको छैन । लगातार वर्षा भएको कारण ठाउँठाउँको सडकमा गएको पहिरोले चार दिनदेखि अवरुद्ध भएको सडक अझै सन्चालनमा आएको छैन ।
चार दिनदेखि अवरुद्ध हुँदै आएको हुम्ला जिल्लामा पर्ने कर्णाली कोरिडोर लगायतका आन्तरिक सडकहरू अझै खुल्न सकेका छैनन् । वर्षाको कारण सबैभन्दा पहिले सिमकोट हिल्सा सडकको नाम्खा र सिमकोट गाउँपालिकाको सिमाना हेक्पा खोलामा निर्माण गरिएको काठेपुल बाढीले बगाए पछि सडक अवरुद्ध हुन सुरु भएको थियो ।
प्रहरी निरीक्षक नरेन्द्र चन्दका अनुसार आइतबार बिहान नाम्खा गाउँपालिका– ५ को नारा लेकमा २० मिटर सडकलाई पहिरोले क्षति पुर्याएपछि यारी हिल्सा खण्डको सडक पनि बन्द भएको हो। त्यसैगरि च्याछरा खण्डमा पनि पहिरोले सडक भत्किएको छ । यता नियमित सञ्चालन भई रहने सिमकोट खार्पु खण्डको सडक पनि गत आइतबारदेखि बन्द रहेको छ। यो खण्डमा पनि ठाउँठाउँमा पहिरो गएको कारण सडक बन्द भएको हो।
त्यसैगरि सर्केगार्ड गाउँपालिका– ४ को कालामुडामा गएको पहिरोको कारण सर्केगार्ड खार्पुनाथ सडक खण्डको कर्णाली कोरिडोरको सडक पनि बन्द भएको छ । कोरिडोरकै सलीसल्लाबाट कवाडीको सडक पनि सर्केगार्ड गाउँपालिका– १ को खच्चामा पहिरो गएको कारण सडक अवरुद्ध भएको उहाँले बताउनुभयो । त्यसैगरि ताँजाकोट गाउँपालिकाको पुईँमा खोलामा पनि बाढीले सडक अवरुद्ध गरेको छ ।
प्रहरी निरीक्षक चन्दले आइतबारदेखि कर्णाली कोरिडोरको हुम्ला खण्डको सडक सञ्चालनमा आउन नसकेको बताए। आन्तरिक सडक पनि सुचारु नभएको उनको भनाइ छ । सिमकोट बरगाउँ, ठेहे, दोजाम सडक पनि बन्द रहेको छ । कच्ची सडक र त्यस माथि चार दिन लगातार वर्षा भएको कारण सडक हिलाम्मे भएको छ ।
चंखेली गाउँपालिकामा पनि ठाउँठाउँमा गएको पहिरोको कारण सडक अवरुद्ध भएको छ । अविरल वर्षाको कारण सडक जिल्लाभर अवरुद्ध भएपनि सडक मर्मत गर्ने पहल हुन सकेको छैन । कर्णाली कोरिडोरको हुम्ला खण्डमा सडक अवरुद्ध भएपनि यातायातका साधनहरू ठाउँठाउँमा अलपत्र अवस्थामा छन् ।
नेपालीरैबार । २०८१ असार २६, बुधबार